தயிர் என்பது இந்தியர்களின் அன்றாட உணவில் முக்கிய இடம் பிடித்துள்ள ஒரு சத்தான உணவுப் பொருள். குடல் ஆரோக்கியத்தை மேம்படுத்தும் புரோபயாட்டிக் பாக்டீரியாக்கள், கால்சியம், புரதம் மற்றும் பல்வேறு வைட்டமின்கள் நிறைந்திருப்பதால், தயிர் உடலுக்கு பல நன்மைகளை வழங்குகிறது. ஆனால், எந்த உணவையும் போலவே தயிரையும் அளவுக்கு மீறி சாப்பிடுவது சில உடல்நல பிரச்சனைகளை ஏற்படுத்தக்கூடும் என்று நிபுணர்கள் எச்சரிக்கின்றனர்.
தயிரின் முக்கிய நன்மைகள்
தயிரில் உள்ள லாக்டோபாசில்லஸ் மற்றும் பிபிடோபாக்டீரியம் போன்ற நல்ல பாக்டீரியாக்கள் குடலில் உள்ள நுண்ணுயிர் சமநிலையை பராமரிக்க உதவுகின்றன. இதன் மூலம் செரிமானம் சீராக நடைபெறுவதுடன், நோய் எதிர்ப்பு சக்தியும் மேம்படுகிறது. மேலும், தயிரில் கால்சியம், பாஸ்பரஸ், வைட்டமின் B12, ரிபோஃப்ளேவின் மற்றும் புரதச்சத்து அதிகமாக இருப்பதால் எலும்புகள் மற்றும் பற்கள் வலுவடைய உதவுகிறது. உடல் எடையை கட்டுப்படுத்தவும், இதய ஆரோக்கியத்தை பாதுகாக்கவும் தயிர் உதவக்கூடும் என பல ஆய்வுகள் தெரிவிக்கின்றன.
இதையும் படிங்க : உங்களுக்கு முட்டை சாப்பிட பிடிக்குமா? இந்த விஷயத்தில் கவனமா இருங்க!
அதிகமாக தயிர் சாப்பிட்டால் என்ன நடக்கும்?
புரோபயாட்டிக் நிறைந்த தயிரை அதிக அளவில் தினமும் சாப்பிடுவது குடலில் உள்ள நுண்ணுயிர் சமநிலையை பாதிக்கக்கூடும். இதனால் சிலருக்கு வயிற்றுப்பெருக்கு, வாயுத்தொல்லை, செரிமானக் கோளாறு, மலச்சிக்கல் அல்லது வயிற்றுப்போக்கு போன்ற பிரச்சினைகள் ஏற்படலாம்.
குடல் ஆரோக்கியத்திற்கு நல்லதாக கருதப்படும் தயிரை அளவுக்கு மீறி சாப்பிடாமல் மிதமான அளவில் சாப்பிடுவது முக்கியம் என்று மருத்துவ நிபுணர்கள் கூறுகின்றனர்.
யார் தயிரை கவனமாக சாப்பிட வேண்டும்?
நோய் எதிர்ப்பு சக்தி குறைவாக இருப்பவர்கள், ஹிஸ்டமின் ஒவ்வாமை உள்ளவர்கள், அடிக்கடி அமிலத்தன்மை வாய்ப்புண், தோல் எரிச்சல் அல்லது பூஞ்சை தொற்றால் பாதிக்கப்படுபவர்கள் தயிரை அளவோடு எடுத்துக்கொள்ள வேண்டும்.
அதேபோல், லாக்டோஸ் ஒவ்வாமை உள்ள சிலருக்கு தயிர் சாப்பிட்ட பிறகு வயிற்று உப்புசம், வாயுத்தொல்லை மற்றும் அசௌகரியம் ஏற்படலாம். எனவே உடலின் தன்மைக்கு ஏற்ப தயிரின் அளவைத் தேர்வு செய்வது அவசியம்.
இரவில் தயிர் சாப்பிடலாமா?
ஆயுர்வேதத்தின் படி, தயிர் உடலில் ‘கபம்’ அதிகரிக்கும் தன்மை கொண்டதாக கருதப்படுகிறது. குறிப்பாக இரவு நேரத்தில் தயிர் சாப்பிடுவது சளி, மூக்கடைப்பு, தொண்டை வலி மற்றும் செரிமானக் கோளாறுகளை ஏற்படுத்தும் என கூறப்படுகிறது. இதனால் இரவு நேரத்தில் தயிருக்கு பதிலாக மோர், லேசான ரைத்தா அல்லது நீர்த்த லஸ்ஸி போன்றவற்றை எடுத்துக்கொள்வது சிறந்ததாக ஆயுர்வேத நிபுணர்கள் பரிந்துரைக்கின்றனர்.
இதையும் படிங்க : தினமும் இன்ஸ்டன்ட் நூடுல்ஸ் சாப்பிடுகிறீர்களா? உடலில் நடக்கும் 8 ஆபத்தான மாற்றங்கள்!
தினமும் எவ்வளவு தயிர் சாப்பிடலாம்?
ஊட்டச்சத்து நிபுணர்களின் கருத்துப்படி, ஒரு நாளைக்கு அரை கிண்ணம் முதல் ஒரு சிறிய கிண்ணம் வரை தயிர் சாப்பிடுவது பாதுகாப்பான அளவாக கருதப்படுகிறது. குறிப்பாக மதிய உணவுடன் சேர்த்து சாப்பிடுவது செரிமானத்திற்கு ஏற்றதாக இருக்கும். வீட்டில் தயாரிக்கப்பட்ட புதிய தயிரை தேர்வு செய்வது நல்லது. அதிக புளிப்பு அல்லது பழைய தயிரை தவிர்ப்பதும் குடல் ஆரோக்கியத்தை பாதுகாக்க உதவும்.
தயிர் உடலுக்கு பல்வேறு நன்மைகளை வழங்கும் சத்தான உணவாக இருந்தாலும், அதை அளவோடு மற்றும் சரியான நேரத்தில் சாப்பிடுவது மிகவும் முக்கியம்.
(பொறுப்புத் துறப்பு: மேலே கொடுக்கப்பட்டுள்ள தகவல் இணையத்தில் கிடைக்கும் தகவல்களின் அடிப்படையில் கொடுக்கப்பட்டுள்ளது. இதை வெறும் தகவலாக மட்டும் எடுத்துக் கொள்ள வேண்டும். மேலும் மருத்துவ ஆலோசனைக்கு தகுந்த மருத்துவரை அணுகவும்)
