இன்றைய காலகட்டத்தில் பணிச்சுமை மற்றும் மாறிவரும் வாழ்வியல் மாற்றங்கள் காரணமாக பலரும் தூக்கம் வரமால் அவதிப்பட்டு வருகின்றனர். இதனால் பலர் மருத்துவர்களின் ஆலோசனையோடு தூக்க மாத்திரைகளைப் பயன்படுத்தும் நிலைக்குத் தள்ளப்பட்டுள்ளனர். மாத்திரைகள் இல்லாமல் இயற்கையான முறையில் தூக்கத்தைப் பெற ஒரு எளிய வழியை ஆராய்ச்சியாளர்கள் கண்டுபிடித்துள்ளனர். அதை பற்றி இந்த பதிவில் பார்ப்போம்.
இரவில் தூங்கச் செல்லும்போது கால்களில் சாக்ஸ் அணிந்து கொள்வது மிக விரைவாக தூக்கத்தை வரவழைக்கும் என்று மருத்துவ ஆய்வு கூறுகிறது. சியோல் தேசிய பல்கலைக்கழக ஆராய்ச்சியாளர்கள் நடத்திய ஆய்வில், இரவில் சாக்ஸ் அணியாமல் தூங்கியவர்களை விட சாக்ஸ் அணிந்து தூங்கியவர்கள், அடிக்கடி கண்விழிக்காமல் நீண்ட நேரம் நிம்மதியாக உறங்கியதும் நிரூபிக்கப்பட்டுள்ளது.
இதையும் படிங்க : இரவு 11 மணி ஆகியும் தூங்காம இருக்கீங்களா? இந்த பிரச்சனைகள் வரலாம்..!
நாம் இரவில் சாக்ஸ் அணியும்போது, அது நம் பாதங்களை கதகதப்பாக வைக்கிறது. பாதங்கள் சூடாகும்போது, அங்குள்ள இரத்த நாளங்கள் விரிவடைகின்றன. இரத்த நாளங்கள் விரிவடைவதால், உடலின் மையப்பகுதியில் இருக்கும் வெப்பம் கைகள் மற்றும் பாதங்கள் வழியாக வெளிநோக்கிப் பரவி, உடலின் உட்புற வெப்பநிலை குறையத் தொடங்குகிறது.
சாக்ஸ் அணிவதன் மூலம் இந்த செயல்முறை வேகமாக நடக்கிறது. உடல் வெப்பநிலை குறைவதை கவனிக்கும் மூளை, “தூங்குவதற்கான நேரம் வந்துவிட்டது” என்ற சமிக்ஞையைப் பெற்று, மெலடோனின் என்ற தூக்க ஹார்மோனைச் சுரக்கச் செய்கிறது. இதனால் நமக்கு விரைவாகவும், ஆழமாகவும் தூக்கம் வருகிறது.
