பல்வேறு அம்சங்களுடன் ஸ்மார்ட்போன்களை அறிமுகப்படுத்தி உலக சந்தையில் தனித்த இடத்தைப் பிடித்த OnePlus, தற்போது தனது சர்வதேச வணிகத் திட்டத்தில் பெரிய மாற்றத்தை மேற்கொள்ள இருப்பதாக தகவல்கள் வெளியாகியுள்ளன. அமெரிக்கா மற்றும் ஐரோப்பிய சந்தைகளில் இருந்து OnePlus பிராண்டின் விற்பனையை நிறுத்துவது தொடர்பாக விரைவில் முக்கிய அறிவிப்பை வெளியிடலாம் என கூறப்படுகிறது.
இதுவரை நிறுவனம் அதிகாரப்பூர்வமாக எந்த காரணத்தையும் விளக்கவில்லை. இருப்பினும், அமெரிக்கா மற்றும் ஐரோப்பாவில் புதிய OnePlus போன்கள் அறிமுகப்படுத்தப்படாமல், அந்த சந்தைகளில் இருந்து பிராண்ட் முழுமையாக விலகும் வாய்ப்பு இருப்பதாக தகவல்கள் வெளியாகியுள்ளன.
இந்தியாவில் விற்பனை பாதிக்குமா?
தற்போது OnePlus-ன் மிகப்பெரிய சந்தையாக இந்தியா தொடர்கிறது. ஆண்டுதோறும் விற்பனையாகும் OnePlus ஸ்மார்ட்போன்களில் பெரும்பாலானவை இந்தியாவில் விற்பனையாகின்றன. குறிப்பாக Nord தொடர் மிட்-ரேஞ்ச் பிரிவில் தொடர்ந்து நல்ல வரவேற்பைப் பெற்று வருகிறது. எனவே, இந்திய சந்தையில் OnePlus தயாரிப்புகள் தொடர்ந்து கிடைக்கும்.
ஏற்கனவே OnePlus போன் பயன்படுத்துபவர்களுக்கு என்ன ஆகும்?
OnePlus சாதனங்களை ஏற்கனவே பயன்படுத்தி வரும் வாடிக்கையாளர்கள் உடனடியாக பாதிக்கப்பட மாட்டார்கள். நிறுவனம் வெளியிட்ட தகவலின்படி, ஏற்கனவே விற்பனை செய்யப்பட்ட சாதனங்களுக்கு அவற்றின் அறிவிக்கப்பட்ட காலவரையறை முடியும் வரை மென்பொருள் அப்டேட்கள் மற்றும் விற்பனைக்குப் பிந்தைய சேவைகள் தொடர்ந்து வழங்கப்படும்.
ஐரோப்பாவில் Oppo கவனம் செலுத்துமா?
OnePlus விலகும் பட்சத்தில், அதன் இடத்தை Oppo நிரப்பும் வாய்ப்பு இருப்பதாக கூறப்படுகிறது. ஆனால் OnePlus உருவாக்கிய “குறைந்த விலையில் அதிக அம்சங்கள்” என்ற அடையாளத்தை Oppo எளிதில் நிரப்ப முடியுமா என்பது கேள்வியாக உள்ளது.
