வேலூர் மாவட்டம், பேரணாம்பட்டில் புதிய “மஸ்ஜித்-ஏ-கௌஸே-ஏ-ஆஃஜம்” பள்ளிவாசல் திறப்பு விழா சிறப்பாக நடைபெற்றது. இதில் 500க்கும் மேற்பட்டோர் கலந்து கொண்டு ஆன்மிக நிகழ்வை சிறப்பித்தனர்.
வேலூர் மாவட்டம் பேரணாம்பட்டு அருகிலுள்ள லாலபேட் பகுதியில், இஸ்லாமிய சமூகத்திற்கான புதிய பள்ளிவாசல் திறப்பு விழா சிறப்பாக நடைபெற்றது. லாலபேட் தர்கா எதிரில், லால் மஸ்ஜித் தெருவில் அமைந்துள்ள காயிதே மில்லத் நகர் முதல் தெருவில் “மஸ்ஜித்-ஏ-கௌஸே-ஏ-ஆஃஜம்” மற்றும் “மதரஸா-ஏ-கௌஸே-ஏ-ஆஃஜம்” ஆகியவை புதிதாக கட்டப்பட்டு, ஏப்ரல் 25, 2026 சனிக்கிழமை மாலை அஸர் தொழுகைக்கு பிறகு திறந்து வைக்கப்பட்டது.
கடும் வெயிலை முன்னிட்டு, விழா நிகழ்ச்சிகள் காலையிலேயே லாலபேட் தர்கா மஸ்ஜிதில் தொடங்கப்பட்டன. பல்வேறு பகுதிகளில் இருந்து வந்த உலமா பெருமக்களும், மார்க்க அறிஞர்களும் கலந்து கொண்டு உரையாற்றி, இஸ்லாமிய ஒற்றுமை, கல்வி மற்றும் சமூக முன்னேற்றத்தின் முக்கியத்துவத்தை வலியுறுத்தினர்.
மாலை சுமார் 4.30 மணியளவில் நடைபெற்ற முக்கிய நிகழ்வாக, புதிய பள்ளிவாசல் திறப்பு விழா நடைபெற்றது. மதிப்பிற்குரிய மார்க்க அறிஞர்கள் இணைந்து பள்ளிவாசலை திறந்து வைத்து, சமூகத்திற்கு அர்ப்பணித்தனர். இந்த விழாவில் 500க்கும் மேற்பட்டோர் கலந்து கொண்டு நிகழ்வை சிறப்பித்தனர்.
இந்த நிகழ்ச்சியில் ஹைதராபாத், ஆந்திரப் பிரதேசம், உத்தரப் பிரதேசம் உள்ளிட்ட பல்வேறு மாநிலங்களிலிருந்து வந்த மத அறிஞர்கள், அரபிக் கல்லூரி முதல்வர்கள், பேராசிரியர்கள் மற்றும் நிர்வாகிகள் பங்கேற்றனர்.
