இந்தியாவின் உயரிய இலக்கிய விருதாகக் கருதப்படும் ஞானபீட விருது பெற்றுள்ள கவிஞர் மற்றும் பாடலாசிரியர் வைரமுத்துவுக்கு, மத்திய உள்துறை அமைச்சர் அமித் ஷா வாழ்த்து தெரிவித்துள்ளார். வைரமுத்துவின் நீண்டகால இலக்கியப் பங்களிப்பை பாராட்டிய அவர், இந்த விருது தமிழ் மொழிக்கும் இந்திய இலக்கிய உலகிற்கும் பெருமை சேர்த்துள்ளதாக குறிப்பிட்டுள்ளார்.
ஞானபீட விருது அறிவிக்கப்பட்டதைத் தொடர்ந்து நாடு முழுவதும் பல்வேறு அரசியல் தலைவர்கள் மற்றும் ரசிகர்கள் வாழ்த்துகளைத் தெரிவித்து வருகின்றனர்.
அமித் ஷா வெளியிட்ட வாழ்த்து செய்தி
அமித் ஷா தனது வாழ்த்து செய்தியில், வைரமுத்துவின் பல ஆண்டுகால அர்ப்பணிப்பு, ஆழமான சிந்தனை மற்றும் படைப்பாற்றலுக்கு கிடைத்த உயரிய அங்கீகாரமே இந்த விருது என்று தெரிவித்துள்ளார்.
மேலும், அவரது படைப்புகள் இனி வரும் காலங்களிலும் சமூகத்திற்கு புதிய சிந்தனை, விழிப்புணர்வு மற்றும் நேர்மறையான வழிகாட்டுதலை வழங்கும் என்ற நம்பிக்கையையும் வெளிப்படுத்தியுள்ளார்.
அதோடு, இளம் தலைமுறையினர் தங்களது தாய்மொழி மற்றும் இலக்கியத்தின் மீது ஆர்வம் கொள்ள இந்த சாதனை ஊக்கமாக அமையும் என்றும் அவர் குறிப்பிட்டுள்ளார்.
