ஆன்மிக முக்கியத்துவம் வாய்ந்த திருவண்ணாமலை நகரில் அமைந்துள்ள ஸ்ரீ ரமணாசிரமம் வளாகத்தில், ஸ்ரீ ரமண மகரிஷி அவர்களின் ஆராதனை விழா பக்தி பரவசத்துடன் நடைபெற்றது.
இந்த விழாவில் இளையராஜா கலந்து கொண்டு பக்திப் பாடல்கள் பாடி, அங்கு திரண்டிருந்த பக்தர்களை ஆன்மிக உணர்வில் ஆழ்த்தினார்.
திருவண்ணாமலை, சித்தர்கள் மற்றும் முக்தர்கள் வாழ்ந்த புனித தவபூமியாக கருதப்படுகிறது. இங்கு வாழ்ந்த மகான்களில் முக்கியமானவர் ரமண மகரிஷி. அவர் 1879ஆம் ஆண்டு திருச்சுழியில் பிறந்து, இளம் வயதிலேயே ஆன்மிகத் தேடலில் ஈடுபட்டார். 1896ஆம் ஆண்டு திருவண்ணாமலையில் வந்து தவ வாழ்க்கையைத் தொடங்கினார்.
அவர் பாதாள லிங்கம், விருபாக்ஷ குகை, கந்தாச்ரமம் போன்ற இடங்களில் தீவிர தியானத்தில் ஈடுபட்டார். பின்னர் திருவண்ணாமலை அடிவாரத்தில் தங்கி ஆன்மிகப் போதனைகளை வழங்கி, எண்ணற்ற பக்தர்களின் வாழ்வில் ஒளி பரப்பினார். 1950ஆம் ஆண்டு அவர் மகாசமாதி அடைந்தார்.
இந்த ஆண்டின் ஆராதனை விழா, திருவண்ணாமலை – செங்கம் சாலை மற்றும் கிரிவலப்பாதையில் அமைந்துள்ள ரமணாசிரமத்தில் மங்கள இசையுடன் தொடங்கியது. தொடர்ந்து ரமண பகவான் சிலைக்கு சிறப்பு அபிஷேகம், அலங்காரம், வேத மந்திரங்கள் முழங்க கற்பூர ஆரத்தி நடைபெற்றது.
பின்னர் நடைபெற்ற இசை நிகழ்ச்சியில் இளையராஜா “பிக்ஷைப் பாத்திரம் ஏந்தி வந்தேன்”, “சுற்றுகிற உலகத்திலே”, “விண்ணோர் தொழும்” போன்ற பக்திப் பாடல்களை பாடினார். அவரது இனிய குரலில் பக்தர்கள் மெய்மறந்து ஆனந்தத்தில் மூழ்கினர்.
இந்த விழாவில் ஏராளமான பக்தர்கள் கலந்து கொண்டு ஆன்மிக அனுபவத்தை பகிர்ந்து கொண்டனர்.
