ஓணம் பண்டிகையையொட்டி கேரளா மற்றும் பிற மாநிலங்களுக்கு இடையேயான பயணிகள் நெரிசலை சமாளிக்கும் வகையில் 100-க்கும் மேற்பட்ட சிறப்பு ரயில்களை இயக்க இந்திய ரயில்வே திட்டமிட்டுள்ளது. இந்த அறிவிப்பை மத்திய ரயில்வே அமைச்சர் அஸ்வினி வைஷ்ணவ் வெளியிட்டுள்ளார்.
புவனேஸ்வரில் நடைபெற்ற நிகழ்ச்சியில் காணொலி வாயிலாக உரையாற்றிய அஸ்வினி வைஷ்ணவ், கேரளாவில் ஓணம் பண்டிகையின்போது ஏற்படும் அதிகப்படியான பயணிகள் கூட்டத்தை கருத்தில் கொண்டு 100-க்கும் மேற்பட்ட சிறப்பு ரயில்கள் இயக்கப்படும் என்று தெரிவித்தார். இதன் மூலம் கேரளாவுக்கு சொந்த ஊர்களுக்கு செல்லும் மக்கள் மற்றும் பிற மாநிலங்களில் இருந்து பயணம் செய்யும் பயணிகள் அதிக வசதியை பெறுவார்கள் என அவர் கூறினார்.
ரதயாத்திரைக்கும் சிறப்பு ரயில்கள்
ஓணம் மட்டுமல்லாமல், ஒடிசாவின் புரியில் நடைபெறும் ஜெகந்நாதர் ரதயாத்திரையை முன்னிட்டு 300-க்கும் அதிகமான சிறப்பு ரயில்களும் இயக்கப்பட உள்ளதாக அமைச்சர் அறிவித்தார். பெரிய திருவிழாக்கள் மற்றும் பண்டிகை காலங்களில் ஏற்படும் கூட்ட நெரிசலை குறைப்பதற்காக இந்திய ரயில்வே தொடர்ந்து சிறப்பு சேவைகளை இயக்கி வருகிறது என்றும் அவர் குறிப்பிட்டார்.
15 ஆயிரம் சிறப்பு ரயில்கள்
கடந்த கோடை கால விடுமுறையை முன்னிட்டு நாடு முழுவதும் சுமார் 15,000 சிறப்பு ரயில்கள் இயக்கப்பட்டதாகவும், இது இந்திய ரயில்வே வரலாற்றில் குறிப்பிடத்தக்க நடவடிக்கையாக அமைந்ததாகவும் அஸ்வினி வைஷ்ணவ் தெரிவித்தார். குறைந்த மற்றும் நடுத்தர வருமானம் கொண்ட குடும்பங்கள் எளிதாக பயணம் செய்யும் வகையில் மலிவு கட்டண சேவைகளுக்கு முன்னுரிமை அளிக்கப்பட்டு வருவதாகவும் அவர் கூறினார்.
