சாலை துடைக்கும் துடைப்பங்களுக்கு பெரிதாக யாரும் கவனம் செலுத்துவதில்லை. ஆனால் Harry Potter and the Goblet of Fire படங்களில் வரும் ‘Firebolt’ போல, தற்போது சீனாவில் பயன்படுத்தப்படும் அதிவேக சாலை சுத்தம் செய்யும் இயந்திரம் சமூக வலைதளங்களில் பெரும் கவனத்தை ஈர்த்துள்ளது.
சமீபத்தில் இணையத்தில் வைரலாகி வரும் ஒரு வீடியோவில், சீனாவில் இயங்கும் புதிய வகை சாலை சுத்தம் செய்யும் தானியங்கி இயந்திரம் அனைவரையும் ஆச்சரியப்பட வைத்துள்ளது. இந்த நவீன ரோடு கிளீனிங் மெஷின் மணிக்கு 80 கிலோமீட்டர் வேகத்தில் இயங்குவதுடன், சாலையில் இருக்கும் தூசி, குப்பைகள், இரும்பு துண்டுகள் மற்றும் பெரிய சிதைவுகளை சில நொடிகளில் அகற்றுகிறது. முக்கியமாக, இதனால் போக்குவரத்துக்கும் எந்த தடையும் ஏற்படுவதில்லை.
இந்த வீடியோவை சீன வெளிவிவகார அமைச்சகத்தின் செய்தித் தொடர்பாளர் தனது சமூக வலைதளத்தில் பகிர்ந்துள்ளார். அதில், “சீனாவின் அதிவேக சாலை சுத்தம் செய்யும் இயந்திரம். மணிக்கு 80 கிமீ வேகத்தில் செயல்பட்டு, போக்குவரத்தை பாதிக்காமல் சாலையில் இருக்கும் கழிவுகளை அகற்றுகிறது. பாதுகாப்பை உறுதி செய்யும் தொழில்நுட்ப முன்னேற்றம் இது” என்று குறிப்பிட்டிருந்தார்.
இதற்கிடையில், சீனா ரோபோடிக்ஸ் துறையில் மேலும் பல புதிய முயற்சிகளை முன்னெடுத்து வருகிறது. இதுவரை தொழிற்சாலைகளில் மட்டுமே பயன்படுத்தப்பட்ட மனித உருவ ரோபோக்கள், தற்போது வீட்டு வேலைகளுக்கும் கொண்டு வரப்படுகின்றன.
இந்த புதிய தொழில்நுட்பத்தின் நோக்கம், மனிதர்கள் தினசரி செய்யும் சாதாரண வேலைகளை ரோபோக்கள் புரிந்து கொண்டு துல்லியமாக செய்ய வைப்பதாகும். சாலை சுத்தம் செய்வதிலிருந்து வீட்டு வேலைகள் வரை, எதிர்காலத்தில் மனிதர்களின் அன்றாட வாழ்க்கையில் ரோபோக்களின் பங்கு மிக அதிகரிக்கப்போகிறது என்பதை சீனா மீண்டும் நிரூபித்துள்ளது.
