கர்நாடகாவில் அரசு திட்டத்திற்காக தனது விவசாய நிலத்தை இழந்தும், 10 ஆண்டுகளாக இழப்பீடு கிடைக்காததால் விரக்தியடைந்த விவசாயி ஒருவர் அரசு அதிகாரியை செருப்பால் தாக்கிய சம்பவம் பெரும் பரபரப்பை ஏற்படுத்தியுள்ளது.
கர்நாடக மாநிலத்தைச் சேர்ந்த பசப்பா என்ற விவசாயிக்கு கிருஷ்ணா நதிக்கரையில் 4 ஏக்கர் விவசாய நிலம் இருந்தது. மாநில அரசின் முக்கிய நீர்ப்பாசனத் திட்டமான மேல் கிருஷ்ணா திட்டத்தின் கீழ் அணை கட்டப்பட்டபோது, அவரது நிலம் நீரில் மூழ்கியது.
விதிமுறைகளின்படி, நிலம் கையகப்படுத்தப்பட்ட பிறகு அவருக்கு மாற்று நிலம் அல்லது உரிய பண இழப்பீடு வழங்கப்பட வேண்டும். ஆனால், பல ஆண்டுகளாக அதிகாரிகளிடம் முறையிட்டும் எந்த தீர்வும் கிடைக்கவில்லை என்று கூறப்படுகிறது.
இந்நிலையில், தனது இழப்பீடு தொடர்பாக விசாரிக்க பசப்பா பாகல்கோட் நகர மேம்பாட்டு ஆணைய அலுவலகத்திற்குச் சென்றார். அங்கு அதிகாரியிடம் தனது கோரிக்கையை மீண்டும் முன்வைத்தார். அப்போது, இருவருக்கும் இடையே கடும் வாக்குவாதம் ஏற்பட்டதாக கூறப்படுகிறது.
வாக்குவாதம் தீவிரமடைந்த நிலையில், ஆத்திரமடைந்த விவசாயி அதிகாரியை செருப்பால் தாக்கியதாக தகவல் வெளியாகியுள்ளது. இந்த சம்பவத்தின் வீடியோ சமூக வலைத்தளங்களில் வேகமாக பரவி வருகிறது.
