விருத்தாசலம், ஜூலை 11:
எனது வீட்டில் ஒட்டுக் கேட்டும் கருவி வைக்கப்பட்டிருந்தாக பாமக நிறுவனர் ராமதாஸ் பரபரப்பு குற்றச்சாட்டை முன்வைத்துள்ளார்.
பா.ம.க. நிறுவனர் ராமதாஸ் தமிழகம் முழுவதும் சுற்றுப்பயணம் மேற்கொண்டு, மாவட்ட பொதுக்குழு கூட்டங்களில் கலந்து கொண்டு வருகிறார்.இந்நிலையில் இன்று கடலூர் மேற்கு மாவட்ட பா.ம.க. மற்றும் வன்னியர் சங்க பொதுக்குழு கூட்டம் நடைபெற்றது. இதில் பா.ம.க. கவுரவத் தலைவர் ஜி.கே. மணி, வன்னியர் சங்க தலைவர் அருள்மொழி, கடலூர் மேற்கு மாவட்ட பா.ம.க. செயலாளர் சுரேஷ் உள்ளிட்ட பலர் கலந்து கொண்டனர்.
இதனையடுத்து கூட்டத்தில் பேசிய ராமதாஸ் , “என் வீட்டிலேயே, நான் உட்கார்ந்திருக்கும் இடத்திலேயே ஒட்டு கேட்கும் கருவி வைத்துள்ளனர். அதனை யார், எதற்காக வைத்தார்கள் என்பதை ஆராய்ந்து வருகிறோம். அந்த கருவி லண்டனில் இருந்து வந்தது” என்று குற்றம்சாட்டினார். இந்த குற்றச்சாட்டு பாமக-வினர் மற்றும் அரசியல் வட்டாரத்தில் பெரும் பரபரப்பை ஏற்படுத்தியுள்ளது.