லார்ட்ஸ் டெஸ்ட் பந்து வீச்சில் தாமதம் – இங்கிலாந்து வீரர்களுக்கு அபராதம்!

லண்டன், ஜூலை 16:

இந்தியா-இங்கிலாந்து இடையிலான 3-வது டெஸ்ட் போட்டி கடந்த 10-ந்தேதி லண்டன் லார்ட்ஸ் மைதானத்தில் தொடங்கியது. இரு அணிகளும் முதல் இன்னிங்சில் 387 ரன்கள் எடுத்து சமநிலையில் இருந்தன. இரண்டாவது இன்னிங்சில் இங்கிலாந்து 192 ரன்னில் ஆல்-அவுட் ஆகியது. இந்தியாவிற்கு 193 ரன்கள் இலக்காக நிர்ணயிக்கப்பட்டது. பதிலுக்கு இந்திய அணி 170 ரன்களுக்கு ஆல்-அவுட் ஆகியதால், இங்கிலாந்து 22 ரன்கள் வித்தியாசத்தில் வெற்றிபெற்றது.

இந்தப் போட்டியில், பந்து வீசும் போது அதிக நேரம் எடுத்துக்கொண்டதற்காக இங்கிலாந்து அணியினருக்கு போட்டி கட்டணத்தில் 10% அபராதம் விதிக்கப்பட்டுள்ளது. இதனுடன், உலக டெஸ்ட் சாம்பியன்ஷிப் புள்ளிப் பட்டியலில் இருந்து 2 புள்ளிகள் பறிக்கப்பட்டுள்ளன.

மேலும் பந்துவீச்சு தாமதம் காரணமாக ஐசிசி விதிகளின்படி இந்த நடவடிக்கை எடுக்கப்பட்டுள்ளது. இங்கிலாந்து அணியின் கேப்டன் மற்றும் வீரர்கள் அனைவரும் இந்த அபராதம் மற்றும் புள்ளிகள் குறைப்பு செயலில் பாதிக்கப்பட்டுள்ளனர்.