புதிய தோற்றத்துக்கு தயாராகும் சென்னை எழும்பூர் ரயில் நிலையம்

சென்னை, ஆகஸ்ட் 28

சென்னையின் வரலாற்று சிறப்புமிக்க கட்டிடங்களில் ஒன்றாக விளங்கும் எழும்பூர் ரயில் நிலையம், அதன் பாரம்பரிய அழகை பாதுகாத்தபடியே, நவீன வசதிகளுடன் புதுப் பதிப்பாக உருவெடுத்து வருகிறது. மறு சீரமைப்பு பணிகள் முழு வீச்சில் நடைபெற்று வருகின்றன.

மெட்ரோ நிலையம் எழும்பூர் ரயில் நிலையத்துடன் நேரடியாக இணைக்கப்பட்டுள்ளதால், பஸ், கார், ஆட்டோ உள்ளிட்ட போக்குவரத்துக் கூடுதலான வசதிகள் உருவாக்கப்படுகின்றன. பயணிகள் எளிதாக ஏற, இறங்கிச் செல்லும் வகையில் ரயில் நிலையம் விரிவாக்கம் செய்யப்படுகிறது.

பயணிகள் வசதிக்காக தரமான உணவு குறைந்த விலையில் கிடைக்க உணவகங்கள் அமைக்கப்படுகின்றன. அதேவேளை, ஷாப்பிங் செய்ய வணிகப் பகுதிகள் உருவாகின்றன. வாகன நிறுத்த சிக்கல்கள் தவிர்க்க, பல அடுக்குகள் கொண்ட பார்க்கிங் வசதிகள் கட்டப்பட்டு வருகின்றன. காந்தி இர்வின் சாலையிலும், பூந்தமல்லி சாலையிலும் மோட்டார் சைக்கிள், கார், ஆட்டோக்கள் நிறுத்தும் வகையில் ஐந்து அடுக்குகள் கொண்ட பிரமாண்ட பார்க்கிங் இடங்கள் உருவாகின்றன.

பயணிகள் எளிதில் ரயில் நிலையத்தில் நுழையவும், வெளியேறும் வசதியையும் மேம்படுத்துவதற்காக எஸ்கலேட்டர்கள், லிப்ட்கள் புதிதாக நிறுவப்படுகின்றன. உயர் நடைபாதைகள், நடை பாலங்கள் என்பனவும் பயணிகள் பாதுகாப்பிற்காக அமைக்கப்படுகின்றன. ரயில்கள் வருகை மற்றும் புறப்பாட்டுக்காக தனித்தனி பகுதிகள் ஒதுக்கப்பட்டு, தரை தளம் மற்றும் மூன்று அடுக்குகளுடன் புதிய கட்டிடமும் கட்டப்படும். விமான நிலைய பயணிகளுக்கென சிறப்பான வழியும் ஏற்படுத்தப்படுகிறது.

புதிய வசதிகளின் ஒரு பகுதியாக, பார்சல் அலுவலகம், ரயில்வே மெயில் சர்வீஸ் அலுவலகம் ஆகியவை பூந்தமல்லி சாலையில் கட்டப்படுகின்றன. மேலும், துணை மின்நிலையம், ரயில்வே குடியிருப்புகள் போன்றவை மேம்படுத்தப்படுகின்றன. மாற்றுத் திறனாளிகளுக்காக கூடுதல் வசதிகள், குளிர்ந்த குடிநீர், மேம்பட்ட கழிவறைகள் போன்ற சேவைகள் நிறுவப்படுகின்றன. ரயில் நிலையத்தின் குடிநீர் தேவையை சந்திக்க, வடக்குப் பகுதியில் தரை அடியில் பிரமாண்ட “சம்ப்” தொட்டி கட்டப்பட்டுள்ளது. இதன் மூலம் பயணிகளின் தேவையும், ரெயில்களுக்கான குடிநீர் விநியோகமும் பூர்த்தி செய்யப்படும்.

சென்னையின் பாரம்பரிய சின்னம் எனக் கருதப்படும் எழும்பூர் ரயில் நிலையம், காலத்தின் தேவையோடு இணைந்து, நவீனமயமாகும் வழியில் முக்கிய முன்னேற்றத்தை எடுத்து வருவது நகர மக்களிடம் பெரும் எதிர்பார்ப்பை ஏற்படுத்தியுள்ளது.