பீகார், நவம்பர் 14:
பீகார் சட்டப்பேரவைத் தேர்தலுக்கான வாக்கு எண்ணிக்கை முழு வேகத்தில் நடைபெற்று வருவதால், பல முக்கிய வேட்பாளர்களின் நிலைமை திடீர் திருப்பங்களை சந்தித்து வருகிறது. அதில், மகாகத்பந்தன் கூட்டணியின் முதலமைச்சர் வேட்பாளர் தேஜஸ்வி யாதவ் தற்போது பின்னடைவை சந்தித்துள்ளார்.
பீகார் சட்டப்பேரவைத் தேர்தலில் பதிவான வாக்குகள் இன்று காலை முதல் எண்ணப்பட்டு வருகின்றன. சமீபத்திய நிலவரப்படி, தேசிய ஜனநாயகக் கூட்டணி (என்டிஏ) 208 தொகுதிகளில் முன்னிலை பெற்று வலுவான நிலையில் உள்ளது. இதே வேளையில், மகாகத்பந்தன் (இந்தியா கூட்டணி) 28 தொகுதிகளில் மட்டுமே முன்னிலையில் இருந்து கடும் பின்னடைவை சந்தித்து வருகிறது.
மகாகத்பந்தனில் முக்கிய இடம் வகிக்கும் காங்கிரஸ் கட்சி, மொத்தம் 61 தொகுதிகளில் போட்டியிட்டுள்ளது. ஆனால் தற்போதைக்கு கிசன்கஞ்ச் மற்றும் பாகல்பூர் ஆகிய இரண்டு தொகுதிகளில் மட்டுமே முன்னிலை பெற்றுள்ளது என்பது குறிப்பிடத்தக்கது. இந்த நிலைமை, கூட்டணியின் மொத்த வலிமையைத் தளர்த்தும் வகையில் அமைந்துள்ளது.
மகாகத்பந்தன் கூட்டணியின் முதலமைச்சர் வேட்பாளரும் பீகார் முன்னாள் துணை முதலமைச்சருமான தேஜஸ்வி யாதவ், ரகோபூர் தொகுதியில் போட்டியிட்டு வருகிறார். மதியம் 3.40 மணி நிலவரப்படி, 15 சுற்று வாக்கு எண்ணிக்கை முடிவுகளின் அடிப்படையில், தேஜஸ்வி யாதவ் 52,942 வாக்குகள் பெற்றுள்ளார். அதே நேரத்தில், பாஜக வேட்பாளர் சதீஷ் குமார் 61,403 வாக்குகளுடன் முன்னிலையில் உள்ளார்.
இதன் மூலம், தேஜஸ்வி யாதவ் தற்போது 8,461 வாக்குகள் பின்னடைவை சந்தித்துள்ளார். வாக்கு எண்ணிக்கை தொடர்ந்து நடைபெற்று வருவதால், அடுத்தடுத்த சுற்றுகளில் அவர் நிலைமை மாற்றுமா என்ற ஆர்வம் அரசியல் வட்டாரங்களில் கிளம்பியுள்ளது.