மதுரை, செப்டம்பர் 11:
அமமுக பொதுச் செயலாளர் டிடிவி தினகரன், எடப்பாடி பழனிசாமி பொதுச் செயலாளராக இருக்கும் வரை அதிமுக அரசு ஆட்சிக்கு வராது எனத் தெரிவித்தார்.
மதுரையில் செய்தியாளர்களுடன் பேசியபோது, துணை முதல்வர் உதயநிதி ஸ்டாலின் சொன்ன கருத்தை சுட்டிக்காட்டிய அவர், “எங்களது வெற்றியின் ரகசியம் பழனிசாமி தான். அதிமுக பொதுசெயலாளராக அவர் நீடிக்க வேண்டும். அவர் 100 ஆண்டுகள் வாழ வேண்டும். பழனிசாமி எதிர்க்கட்சித் தலைவர் இருந்தால் வெற்றி எங்களுக்கு சுலபமாக இருக்கும்” என்று கூறியதைக் டிடிவி தினகரன் குறிப்பிட்டார்.
திமுகவுக்கு கூட்டணி பலம் எல்லாம் ஒரு பக்கம் இருந்தாலும் பழனிசாமிதான் அவர்களது வெற்றியின் ரகசியம் என்பதை போட்டு உடைத்துவிட்டார். இதை ஜெயலலிதாவின் தொண்டர்கள், அதிமுகவை ஒன்றிணைக்க வேண்டும் என்று முயற்சி செய்பவர்கள் புரிந்துகொள்ள வேண்டும் என்று அவர் தெரிவித்துள்ளார்.
மேலும், “சுயநலமிக்க, துரோக சிந்தனையுள்ள பழனிசாமி அதிமுக பொதுச் செயலாளராக இருக்கும்போது அதிமுக ஆட்சிக்கு வராது என்பது உண்மை” என்றும் டிடிவி தினகரன் கூறியுள்ளார்.