ஒரே நேரத்தில் இரு காற்றழுத்த தாழ்வுகள்: வானிலை மையம்

சென்னை, அக்டோபர் 31:

இந்திய வானிலை மையம் இன்று தெரிவித்ததாவது, நாட்டின் வடகிழக்கு மற்றும் மேற்குக் கடற்பகுதிகளில் ஒரே நேரத்தில் இரு காற்றழுத்த தாழ்வு மண்டலங்கள் உருவாகி உள்ளன.

கடந்த வாரம் வங்கக் கடலில் உருவான காற்றழுத்த தாழ்வு பகுதி வலுவடைந்து ‘மோன்தா’ புயலாக மாறியது. அது தீவிர புயலாக வலுவடைந்ததும் ஆந்திர மாநில கடற்கரைப் பகுதியாகிய மகண்ட பகுதியில் திங்கட்கிழமை கரையை கடந்து சென்றது. இதனால் தமிழகத்தில் பெரிய பாதிப்பு ஏற்படவில்லை. ஆனால், அப்புயல் காற்றழுத்த தாழ்வு நிலைக்கு மாறும் காலத்தில் தமிழ்நாட்டின் வடக்கு மாவட்டங்களில் பல இடங்களில் மிதமான முதல் கனமழை வரை பொழிந்தது.

பருவமழையின் தொடக்கத்தில் ஏற்பட்ட அந்த தாழ்வுப் பகுதி மூலம், வழக்கத்தை விட அதிக மழை பதிவானது. ஆனால், அதன்பின்னர் வட மாவட்டங்களில் எதிர்பார்த்த அளவுக்கு மழை இல்லாததால் சிறிய ஏமாற்றமும் ஏற்பட்டது.

இந்நிலையில் இன்று காலை ஒரே நேரத்தில் இரண்டு புதிய காற்றழுத்த தாழ்வுப் பகுதிகள் உருவாகியுள்ளதாக வானிலை மையம் தெரிவித்துள்ளது. அதில் ஒன்று வட சத்தீஸ்கர் மற்றும் அதனை ஒட்டிய மத்திய இந்திய பகுதிகளில் இன்று காலை 5.30 மணி அளவில் உருவாகியுள்ளது. இது வடக்கு-வடகிழக்கு நோக்கி நகர்ந்து, கிழக்குப் பீகார் நோக்கி செல்லும் என்று கூறப்பட்டுள்ளது. இது அடுத்த 24 மணி நேரத்தில் படிப்படியாக பலவீனம் அடையும் வாய்ப்பும் உண்டு என இந்திய வானிலை மையம் குறிப்பிட்டுள்ளது.

இன்னொரு காற்றழுத்த தாழ்வு பகுதி கிழக்கு மத்திய அரபிக்கடலில் உருவாகியுள்ளது. கடந்த 6 மணி நேரத்தில் இது மணிக்கு 7 கிலோமீட்டர் வேகத்தில் மெதுவாக வடக்கு-வடகிழக்கு திசையில் நகர்ந்து, அதே பகுதியில் நிலைத்திருப்பதாகவும், நாளையிலிருந்து இது மேலும் வட நோக்கி நகர்ந்து பின்னர் பலவீனமடையும் என்றும் வானிலை மையம் தெரிவித்துள்ளது.

புதிதாக உருவான இந்த இரு காற்றழுத்த தாழ்வுகளும் தமிழகத்தை பாதிக்கும் வாய்ப்பு மிகக் குறைவாக உள்ளது. எனினும், கிழக்கு திசைக் காற்றின் வேக மாற்றம் காரணமாக தமிழகத்தில் சில இடங்களில் மட்டும் லேசான மழை பெய்யக்கூடும் என்று சென்னை வானிலை மையம் அறிவித்துள்ளது.